Ons bied verskeie kursusse vir aktetiksters aan

Bywoning per diploma

R4,500 of
R3,900 vir vroeë registrasie

Bywoning per module

R1,600 of
R1,400 vir vroeë registrasie

Registreer vir Bywoning

Selfstudie per diploma

R3,900

Selfstudie per module

R1,400

Registreer vir Selfstudie

Aanlyn per diploma

R2,940 met assesering
R2,394 sonder assesering

Aanlyn per module

R980 met assesering
R798 sonder assesering

Registreer Aanlyn

Doelwit

Om aan aktetiksters en persone wat graag ‘n loopbaan as aktetikster wil volg intensiewe teoretiese
en praktiese opleiding te bied en terselfdertyd van ‘n loopbaangerigte kwalifikasie te voorsien.

3 Diplomas in aktepraktyk - 9 modules
Opleiding vir Diploma en Gevorderde Diploma geskeduleer vir 2013, DV

Basiese Diploma

Geskik vir beginners tot persone wat reeds vir ‘n aantal jare in ‘n aktepraktyk werk en hul kennis en vaardighede wil verbeter. Dit is die gewildste diploma en lê die basis waarop enige verdere kennis van aktes gebou word.

Leerplan

Module 1
Konvensionele Transportakte
(Teorie)

Module 2
Konvensionele Transportakte
(Praktiese gevallestudie)

Module 3
Verbandregistrasie & Kansellasieprosedure
(Teorie en praktyk)

meer inligting...

Diploma

Geskik vir persone wat reeds die Basiese Diploma gedoen het of reeds vir ongeveer een tot twee jaar in ‘n aktepraktyk werk. Meer gespesialiseerde onderwerpe word hierin behandel.

Leerplan

Module 4
Deeltiteltransportakte
(Teorie en praktiese gevallestudie)

Module 5
Boedeloordragte
(Teorie en praktyk)

Module 6
Capita Selecta
(Kommissaris van ede, endossemente, BTW, hereregte, kapitaalwinsbelasting en basiese beginsels van koopooreenkoms)

meer inligting...

Gevorderde Diploma

Geskik vir persone wat die eerste twee diplomas gedoen het of reeds vir meer as twee jaar gemaklik en selfstandig in ‘n aktepraktyk werk. Dit is vir persone wat reeds gevorderde werk doen of daarna streef om na die vlak van senior aktetikster te vorder.

Leerplan

Module 7
Serwitute, onderverdeling en konsolidasie van eiendom. (Teorie en praktyk)

Module 8
Opening van ‘n deeltitelregister.
(Teorie en praktyk)

Module 9
Opening van ‘n dorpsregister.
(Teorie en praktyk)

meer inligting...

Metodes van aanbieding

Bywoning

Lesings in die eerste ses modules (Basiese Diploma en Diploma) word aangebied te Pretoria en Johannesburg. Die laaste drie modules (Gevorderde Diploma) is slegs beskikbaar op die internet.

Daar is 'n spesiale korting op die registrasiefooi vir persone wat vroeg registreer.

Selfstudiekursus

Persone wat nie lesings in modules 1 tot 6 kan bywoon nie, kan dit deur selfstudie doen. Skryf enige tyd in. Die enigste vereiste is dat elke module voltooi moet word binne twee maande na registrasie en ‘n diploma binne ses maande.

Aanlyn

Modules 7, 8 en 9 kan aanlyn deur die internet gevolg word. Skryf enige tyd in.

Kenmerke van die kursus

Beide teorie en praktiese gevallestudies word behandel om te illustreer hoe die teorie in die praktyk toegepas word.
Omvattende en gebruikersvriendelike notas met voorbeelde word voorsien wat leerders na afloop van die kursus ook by die werk kan raadpleeg.
Die lesings is ontspanne en volg die notas en voorbeelde.
Tydens die eerste ses modules vind ‘n oopboek-evaluasie plaas om te toets of leerders die werk wat behandel is, verstaan en kan toepas.

Oopboek evaluasie

In die Basiese Diploma en die Diploma word leerders aan die hand van 'n oopboek-toets geëvalueer. Die idee is nie om persone se geheue te toets nie, m.a.w om te kyk wat hulle uit die kop kan onthou nie, maar eerder om vas te stel of hulle prakties kan toepas wat gedurende die les met hulle behandel is. Daarom mag hulle die notas wat aan hulle beskikbaar gestel is in die evaluasie gebruik, op dieselfde wyse as waarop hulle dit op kantoor sou gebruik.

By die Gevorderde Diploma het leerders ‘n keuse om nie aan die evaluasie mee te doen nie.

Silwer- & Goue Sertifikate

'n Silwersertifikaat word uitgereik na die suksesvolle evaluasie van elke module as bewys dat die leerder die vermoë het om die leerinhoud wat op die module betrekking het, te kan toepas.

'n Goue sertifikaat word uitgereik nadat 'n beëdigde verklaring van die leerder se werkgewer ontvang is waarin bevestig word dat sekere voorgeskrewe praktiese werk, verbonde aan die spesifieke module, selfstandig en foutloos afgehandel is.

'n Admininstrasiefooi van R100 (BTW ingesluit) is ten aansien van elke goue sertifikaat en goue diploma wat aangevra word, betaalbaar.

Tydsduur vir bywoning

Elke module van die Basiese Diploma en die Diploma

strek oor een-en-‘n-halwe dag elk; en

word gedurende weeksdae aangebied.

Al drie modules van 'n diploma kan in een week gedoen word.

Datums vir bywoning

Sien die datums in registreer bywoning

Taal

Lesings en kursusnotas is volledig in Afrikaans of in Engels.

Afrikaanse leerders mag Engelse lesings met Afrikaanse notas bywoon en omgekeerd, op voorwaarde dat dit spesifiek so by registrasie aangetoon word.

Aanbieder

Die lesings word aangebied deur Erinda Frantzen, 'n prokureur, transportbesorger en notaris in die kantoor van Gawie le Roux.

Afbetaalreëling

'n Afbetaalreëling kan getref word - sien registreer bywoning.

Module 7 – Serwitute, Onderverdeling en Konsolidasie van eiendom

Skepping en beskrywing van serwitute (soos persoonlike- en grondserwitute) in transport- en notariële aktes.
Kwalifikasie van voorwaardes by konsolidasie en onderverdeling.
Teoretiese agtergrond en algemene beginsels oor die werking van sertifikate van geregistreerde titel.
Teorie oor onderverdeling en konsolidasie. Praktiese voorbeelde en opstel van aansoeke en sertifikate vir onderverdeling en konsolidasie van eiendom.
Praktiese gevallestudie ter toepassing van die beginsel van serwitutue, onderverdeling en konsolidasie.
Belang van kaarte by onderverdeling en konsolidasie. Afhandeling van verbande by konsolidasie en onderverdeling.
Evaluering vir Silwer Sertifikaat - Module 7 of ontvang Brons Sertifikaat vir bywoning.

Module 8 - Opening van 'n Deeltitelregister (Deeltitelskema)

Teorie en praktiese voorbeelde vir die opening van 'n deeltitelregister en registrasie van 'n deelplan, waaronder: aansoek deur ontwikkelaar, artikel 11(3)(b) bylae van voorwaardes, toestemming van verbandhouer, sertifikaat van transportbesorger rakende reëls, sertifikate van saaklike reg van uitbreiding van die skema asook saaklike reg van uitsluitlike gebruiksgebiede, sertifikate van geregistreerde deeltitel ten aansien van elke deel, en registrasie van deelplan van uitbreiding.
Beginsels oor die mede-eienaarskap van 'n deel, handelinge met gemeenskaplike eiendom, onderverdeling en konsolidasie van 'n deel, uitbreiding van dele, uitsluitlike gebruiksgebiede, die regspersoon, werksaamhede van die regspersoon en reëls van die skema.
Twee praktiese gevallestudies vir die opening van ‘n deeltitelregister.
Evaluering vir Silwer Sertifikaat - Module 8 of ontvang Brons Sertifikaat vir bywoning.

Module 9 - Opening van 'n Dorpsregister (Dorpstigting)

Teorie en praktiese voorbeelde vir die opening van 'n dorpsregister en die registrasie van ‘n algemene plan, waaronder: ‘n dorp uitgelê op ‘n gedeelte van ‘n stuk grond, of op slegs ‘n gedeelte van ‘n stuk grond, of op meerdere stukke grond.
Beplanning en verloop van proses wat die opening van die dorpsregister voorafgaan.
Eerste transport van erwe direk vanaf die algemene plan ná dorpstigting.
Permanente liassering van die titelakte, verbandakte en verwante aangeleenthede.
Fokus op dorpstigting in terme van Ordonansie op Dorpe en Dorpsbeplanning (TVL) 15 van 1986 en die Wet op Ontwikkelingsfasilitering.
Evaluering vir Silwer Sertifikaat - Module 9 of ontvang Brons Sertifikaat vir bywoning.

Module 4 - Deeltiteltransportakte

Teorie oor die algemene grondbeginsels van toepassing op deeltitels, verskille tussen ‘n konvensionele transportakte en deeltiteltransportakte met as fokus die oordrag van ‘n deeltiteleenheid en uitsluitlike gebruiksgebied.
Praktiese gevallestudie vir die oordrag van ‘n deeltiteltransport, waaronder: ontleding van ‘n koopooreenkoms en ‘n aktesoek, opstel van ‘n deeltiteltransportakte, volmag, ondersteunende dokumente, notariële akte van sessie van uitsluitlike gebruiksgebied, aanvra van kansellasiesyfers & waarborge, hantering van korrespondensie, indiening van dokumente by aktekantoor, opstel van pro-forma- en finale rekening.
Alle aspekte vanaf die ontvangs van die opdrag tot sluiting van die lêer.
Evaluering vir Silwer Sertifikaat - Module 4.

Module 5 - Boedeloordragte

Teorie en praktiese oefeninge vir die oordrag van ‘n eiendom uit ‘n solvente bestorwe boedel weens verkoping of vererwing, waaronder: beskrywing van partye, artikel 42(1) en 42(2) sertifikate, beskrywing van verskeie soorte causae, ontneming van gemeenskaplike boedel, ondersteunende dokumente vir indiening, artikel 18(3) boedels, boedels betrekking op intestate vererwing van swart persone, asook boedel-endossemente kragtens artikel 45(1) van die Akteswet en 40(1)(b) van die Boedelwet.
Teorie en praktiese oefeninge rakende oordragte kragtens insolvente bestorwe boedel- en eksekusieprosedures.
Evaluering vir Silwer Sertifikaat - Module 5.

Module 6 - Capita Selecta -Kommissaris van Ede, Endossemente, Verlore Aktes, Hereregte, BTW, Kapitaalwinsbelasting & sleutelklousules van ‘n koopkontrak

Funksies van ‘n Kommissaris van Ede en praktiese riglyne vir die aanstelling van ‘n aktetikster as Kommissaris van Ede.
Teorie en praktiese voorbeelde van verskeie endossemente (artikels 3(1)(v), 4(1)(b), 16, 17(4), 24bis(2), 25(3), 44, 45(1), 45bis(1)(a), 45bis(1)(b), 45bis(1A), 58(2), 68(1), 93(1)) en verlore aktes.
Beginsels van BTW, hereregte en kapitaalwinsbelasting. Berekening van hereregte en boete-hereregte. Vrystelling van hereregte. Dokumente vir indiening by die Ontvanger.
Ontleding van sleutelklousules van ‘n koopkontrak.
Evaluering vir Silwer Sertifikaat - Module 6.

Module 1 - Konvensionele Transportakte - teorie

Teorie vir die oordrag van ‘n eenvoudige transportakte, waaronder die volgende: eiesoortige akte-terminologie, pligte van ‘n aktetikster, etiek in ‘n aktepraktyk, rekeninge in ‘n prokureurspraktyk, doel van ‘n koopooreenkoms, transportakte en volmag, ontleding van die klousules van ‘n transportakte en ‘n volmag, belangrike prosedures in ‘n aktepraktyk vanaf die opening van ‘n lêer tot die sluiting daarvan.
Belangrike prosedures, praktyk & etiek in 'n aktepraktyk.
Evaluering vir Silwer Sertifikaat - Module 1.

Module 2 - Konvensionele Transportakte - praktiese gevallestudie

Praktiese gevallestudie vir die oordrag van ‘n voltitel eiendom deur middel van ‘n transportakte, waaronder: ontleding van ‘n koopooreenkoms en ‘n aktesoek, opstel van ‘n transportakte (alle klousules), volmag, ondersteunende dokumente, uitvoeringsomslag vir indiening, hantering van korrespondensie, aanvra van kansellasiesyfers & waarborge, opstel van pro-forma- en finale rekening, hereregte & BTW (basiese beginsels).
Alle aspekte vanaf die ontvangs van opdrag tot sluiting van lêer.
Evaluering vir Silwer Sertifikaat - Module 2.

Module 3 - Verbandregistrasie & kansellasieprosedure

Teorie en praktiese voorbeelde vir die registrasie en kansellasie van verbande, waaronder: leningsaansoek- en verbandregistrasieprosedure, vanaf die ontvangs van opdrag, nagaan van verbandinstruksie, verkryging van inligting en dokumente, korrespondensie, opstel van verbanddokumente, versending van dokumente na bank, voorbereiding, registrasie, aflewering en nuttige wenke.
Teorie en praktyk van sekere verbandklousules, bv. hantering van titelvoorwaardes, nie-benadelingsklousule, en handelinge met verbande, bv. afstanddoening van voorrang.
Prosedure by verskillende soorte verbande, waaronder: bou-, privaat-, dekkings- en deeltitelverbande, asook prosedure by die kansellasie van verbande.
Evaluering vir Silwer Sertifikaat - Module 3.

Ons bied verskeie kursusse vir aktetiksters aan

Basiese Diploma

Diploma

Gevorderde Diploma

"Vir diegene wat ernstig oor aktes is"

Die 2011 brosjure is nog nie beskikbaar nie. Inligting op ons webblad is volledig en op datum.